Ndryshimet e bëra në qeveri nga kryeministri Edi Rama kanë sjellë dhe reagimin e Presidentit Ilir Meta.
Nga Korça, ku mori pjesë në mensën e shtruar për të varfrit, Meta duke mos pranuar të futet në komente të thella, deklaroi se filozofia e qeverisjes duhet të ndyshojë në mënyrë që të sjellë sa më shumë ndryshime pozitive për njerëzit në vështirësi.
“Nuk do të dëshiroja të hyja në komente të tilla, aq më tepër që nuk jam njohur realisht dhe plotësisht me këto ndryshime. Për mua është thelbësore të ndryshojë filozofia e qeverisjes, e cila duhet të jetë një filozofi bashkëpunuese. Bashkëpunuese me opozitën, bashkëpunuese me grupet e interesit, për bërjen e ligjeve më të mira dhe zbatimin e tyre. Bashkëpunuese me institucionet e pavarura, sepse kjo do të na ndihmojë që të jemi edhe më reflektues për të sjellë ato ndryshime, për të cilat në radhë të parë kanë nevojë njerëzit më në vështirësi, kanë nevojë një pjesë e madhe e shqiptarëve për të dalë nga pragu i varfërisë në të cilin ndodhen sot, por aq më tepër për të zgjeruar e për të konsoliduar shtresën e mesme në vendin e shoqërinë tonë, që është domosdoshmëri për të evituar një ndarje sociale, e cila mund të bëhet shumë e rrezikshme për shoqërinë tonë.”
Por krahas kësaj, Meta shprehu kritika në lidhje me ndryshimin e ministrit të Bujqësisë.
Sipas Metës, ndryshimet e emrave të ministrave të Bujqësisë nuk vlejnë për aq kohë sa nuk ndyshohet politika që ky institucion ndjek.
“Nuk është kjo çështja më e rëndësishme meqë më pyetër pak më parë për ndryshimin e ministrit të Bujqësisë. Meqenëse edhe vetë Korça e lidh mjaft fatin e saj me zhvillimin e bujqësisë e të industrive që bazohen te ajo, mund të them që mund të ndryshohet çdo gjashtë muaj ministri i Bujqësisë, por në rast se nuk ndryshohen politikat për zhvillimin e bujqësisë, për mbështetjen e bujqësisë, ndryshimet e emrave, nuk u vlejnë as fermerëve, as ekonomistëve të vendit. Dhe për këtë nuk dua të lodhem shumë. Kam kohë që e kërkojë të ndjekim modelin e Maqedonisë, që është kaq afër Shqipërisë dhe Korçës.”
Ndërsa sa i takon emërimit të dy ministrave nga Kosova, Meta theksoi se për të është e rëndësishme që qeveria të reflektojë dhe të përmirësojë raportin me të vërtetën dhe njerëzit.
“Nuk kam asnjë informacion për këtë çështje. Për mua nuk është e rëndësishme se nga vijnë e si vijnë apo si ikin ministrat. Për mua është e rëndësishme të reflektojmë dhe të përmirësojmë raportin me të vërtetën dhe me njerëzit.”
