Partia Socialiste ka përfunduar pas më shumë se dy orësh mbledhjen e Kryesisë ku I diskutua gjerë e gjatë për situatën në Qarkun e Shkodrës.
Në një deklaratë për mediat, pas mbledhjes, sekretari i Përgjithshëm I PS, Taulant Balla I kërkoi falje në emër të kryeministrit por dhe të tij të gjithë popullit shkodran në lidhje me situatën për kandidatin e tyre.
Balla tha se PS nuk ka asnjë lidhje me këtë ngjarje e se ajo është totalisht personale. Ai shtoi se PS do të ashpërsojë të gjitha mekanizmat në lidhje me personat që nuk deklarojnë të kaluarën e tyre.
“Valdrin Pjetri për shkak të problemeve me drejtësinë në të kaluarën dha dorëheqjen. Ai kishte kryer një vepër, që përfshihej në sferën e ndalimit të ushtrimit të funksionit publik. Kryeministri ka shprehur edhe sot gatishmërinë që personat që nuk deklarojnë të kaluarën e vet, të merren masa ndaj këtyre personave. Ligji i dekriminalizimit është ligj është i rëndësishëm. Përgjegjësia në këtë rast është personale. Dekriminalizimi bëhet përmes mekanizmave. PS do të vazhdojë të jetë forca motor e reformimit të brendshëm dhe për vendin. Ne i kemi kërkuar popullit të Shkodrës falje, por përgjegjësia është personale. PS nuk ka bërë kurrë mburojë për askënd.”
Balla theksoi më tej se në shkurt do të mblidhet Kongresi I PS dhe se e gjithë dega e PS në Shkodër do të futet në një process riformatimi I cili do të ndiqet me kujdes.
“Në shkurt do të jetë Kongresi, i cili do të zgjedhë Asamblenë dhe Kryesinë. Siç e dini PS është e vetmja parti që është në proces të vazhdueshëm demokratizimi. Ne morën vendim që në strukturën e Bashkisë Shkodër të riformatojmë partinë. Kemi marrë vendim për të pasur vëmendje të veçantë. Do të jemi të gjithë të vëmendshëm për të ndjekur procesin e riformatimit të Bashkisë të Shkodrës.”
