Pas 17 fitoresh radhazi Celtic-u i Brendan Rodgers u ndal 1-1 nga Glasgow Rangers. Në derbin e katërt sezonal, blutë kërkonin me patjetër një rezultat inkurajues, kjo pasi në tre sfidat e kaluara qenë mundur. Dërrmuese vazhdon të jetë shuplaka 5-1 e 10 shtatorit, por te Rangers gjërat kanë ndryshuar.
Me largimin e Mark Warburton, skuadrën e drejton Graeme Murty. Ish-trajneri i skuadrave zinxhire udhëhoqi Rangersat në derbin e tij të parë në karrierë. Në Celtic Park gjithsesi të parët shënuan keltët me anë të Stuart Armstrong. Nën 58 mijë spektator spektakli ishte i jashtëzakonshëm. Skuadra e Brendan Rodgers praktikisht e ka mbytur kampionatin pasi nuk numëron asnjë humbje në 28 ndeshje të luajtura.
Diferenca me skuadrat e tjera është parë në cdo takim, por të dielën përballë Rangersave Celticu u barazua nga veterani Clint Hill tre minuta përpara fundit. Shtatlarti i mbrojtjes realizoi golin e dytë sezonal, por me gjasa më të rëndësishmin, pasi me këtë barazim Rangers rifitojnë motivimin e duhur, për të vazhduar deri në fund luftën me Aberdeenin për vendin e dytë.
Megjithëse diferencat janë të mëdha, 33 pikë larg nga Celticu dhe 8 nga Aberdeen-i, në radhët e Rangersave besojnë se sezoni mund të shpëtohet. Ndërkohë nga java e 28-të të kuqtë arritën një fitore minimale 1-0 ndaj Motherwellit, ndërsa në tërësi nga sfidat e tjera spikati fitorja 4-0 e Hearts me Hamilton.
