Katërfishi i punëve është zotimi i Ramës për Gjirokastrën. Ndalesa e radhës e kryesocialistit, Edi Rama, ishte Gjirokastra, zonë në të cilën kërkoi votëbesim duke thënë se do të shtojë investimet.
Në të njëjtën kohë, Rama nënvizoi se nën logon e PS, Gjirokastra është kthyer në atraksion turistik dhe diferenca është e dukshme.
“Dilni masivisht atje jepuni fuqinë tuaj dhe në katër vitet e ardhshme do të bëjmë katërfishin e atyre që kemi bërë në të gjitha vitet që jemi duke punuar së bashku. Sepse sot ky qark është i lidhur i gjithi. Sot nisesh për Tepelenë dhe zbret në Detin Jon në një udhëtim të thjeshtë dhe anasjelltas.
Sot kush vjen në Gjirokastër nuk vjen më vetëm në Gjirokastër. Ajo që duhet të bëjmë ne t’i mbajmë sa më gjatë. Të vijnë jo një ditë apo dy por pesë apo gjashtë. E nesërmja, rruga që spo nis më 14 maj është rruga e fuqizimit të ekonomisë të njerëzve të zakonshëm.
Prandaj lërini ndarjet absurde dhe të jemi të bashkuar për të ecur vetëm përpara”, tha Rama.
Më herët Rama u ndal në Tepelenë, ku kërkoi që qytetarët të mos votojnë aleancën mes Metës e Berishës. Për këtë të fundit u shpreh se ka të hapura hesapet me drejtësinë pasi ka borxhet e gjakut për të larë.
