Kryeministri Edi Rama njoftoi se është aprovuar hapja e një tjetër grupkapitulli të negociatave me Bashkimin Europian, duke e cilësuar këtë si një tjetër hap të rëndësishëm në rrugën drejt anëtarësimit.
Në rubrikën “Sy m’sy”, gjatë një bashkëbisedimi me ndjekësit në rrjetet sociale, Rama deklaroi:
“Dje, teksa po shkoja në Fier, mora lajmin se grupkapitulli tjetër i negociatave u aprovua për t’u hapur. Kemi hapur 16 kapituj dhe po hapim edhe 8 të tjerë. Mbeten 11 për t’u hapur dhe besoj se me energjinë e re të 11 majit, do arrijmë t’i hapim të gjithë brenda këtij viti.”
Kryeministri u shpreh se nëse Shqipëria arrin të hapë të gjithë kapitujt negociues deri në fund të vitit, do shënonte një rekord në historinë e zgjerimit të BE-së, pasi asnjë vend tjetër nuk e ka përmbyllur këtë proces në një periudhë kaq të shkurtër.
“Do të ishte një rekord europian. Asnjë vend nuk i ka hapur të gjithë kapitujt në një vit e as brenda tre vjetësh. Fati europian është në duart tona,” theksoi Rama.
/vizionplus.tv
