Gjatë një takimi elektoral në Urën Vajgurore, kryeministri Edi Rama sulmoi sërish partitë e vogla, për të cilat tha se ato nuk marrin asnjë përgjegjësi, por vetëm kritikojnë dhe çojnë mesazhe të kamufluara, gjysmë shantazh.
“Në këtë sistem republikash partiake brenda shtetit, gjërat nuk funksionojnë. Përgjegjësinë e kemi ne, nuk kërkojnë përgjegjësi tek të tjerët. Partitë e vogla marrin nga pushteti çfarë dëshirojnë por përgjegjësi nuk iu kërkohet, nuk marrin, përkundrazi bëjnë edhe kritizerin, me mesazhe të kamufluara, gjysmë shantazh dhe gjysma politikë konstruktive”.
Kryeministri kërkoi mbështetje me votë, për të qeverisur i vetëm pas 25 qershorit edhe gjatë takimit me gratë e vajzat në Berat. Këtu kreu i qeverisë tha se vetëm Partia Socialiste mund të bëjë realitet reformën në administratën shtetërore.
Rama tha se ekipi i tij nuk është kundër bashkeudhëtarëve në qeverisje por kësaj here drejtimi i takon partisë socialiste e cila vetëm në këtë mënyrë mban përgjegjësi të plotë para qytetarëve.
