Kryeministri Edi Rama ka firmosur shkarkimin e kryebashkiakut të Lushnjes, Fatos Tushe, një ditë pasi u arrestua me urdhër të SPAK, nën akuzën e “shpërdorimit të detyrës”.
Propozimi për shkarkimin e kryebashkiakut është bërë nga ministri i Brendshëm, Bledi Çuçi.
Vendimi është publikuar dhe në fletoren zyrtare, duke hyrë në fuqi menjëherë.
“VENDIM Nr. 407, datë 6.7.2021PËR SHKARKIMIN NGA DETYRA TË KRYETARIT TË BASHKISË LUSHNJË, Z. FATOS TUSHENë mbështetje të neneve 100 e 115, pika 1, të Kushtetutës, dhe të shkronjës “a”, të nenit 62, të ligjit nr. 139/2015, “Për vetëqeverisjen vendore”, të ndryshuar, me propozimin e ministrit të Brendshëm, Këshilli i Ministrave VENDOSI:Shkarkimin nga detyra, për shkak të shkeljeve të rënda, të kryetarit të Bashkisë Lushnjë, z. Fatos Tushe.Ky vendim hyn në fuqi menjëherë dhe botohet në Fletoren Zyrtare.”
Tushe u arrestua në lidhje me një tender abuziv me vlerë 24 mln lekë për rehabilitimin e kanalit ujitës. Forcat e Policisë dhe FNSH zbarkuan në zyrat e kryebashkiakut, duke vendosur në pranga të gjithë personat e përfshirë në aktet korruptive, si dhe duke sekuestruar dokumente të cilat mund të provojnë këto akuza. Bashkë me Tushen u arrestuan 8 zyrtarë të Bashkisë Lushnje dhe 2 biznesmenë.
