Lufta kundër korrupsionit dhe pavarësia e drejtësisë janë çështje thelbësore sa i përket procesit të integrimit në Bashkimin Europian.
Në mbledhjen e Këshillit të Ministrave, Kreu i qeverisë Edi Rama theksoi se duhet një rritje e standardeve te institucionet e drejtësisë si dhe avancim në fushën e prokurimit publik.
“Në procesin e konsolidimit duhet të rrisin profesionalizmin, paanshmërinë dhe cilësinë e shërbimeve. Ky proces siguron luftën kundër korrupsionit, jo thjesht si një luftë që zhvillohet në frontin midis institucioneve të drejtësisë, por edhe në frontin e modernizimit, të transformimit institucional dhe të realizimit të një kapaciteti të të gjithë shtetit për ta parandaluar që të zhvillohet në hapësira gri ose në mungesë të kanaleve të sigurta institucionale”, tha Rama.
Duke e cilësuar një proces të vështirë, Rama siguroi se Shqipëria po ecen përpara në mënyrë që “detyrat e shtëpisë” të vihen në vijë.
“Ajo që flitet në publik është shumë shumë, shumë e reduktuar, ose shumë bazike ose tërësisht pa lidhje me këtë proces. Sigurisht që procesi ka shumë ngarkesë. Megjithatë ne po vijojmë me punën në mënyrë që kur të nisin proceset e tjera të mos jemi prapa”, tha kreu i qeverisë.
Sqarimet teknike u dhanë nga kryenegociatorja Majlinda Dhuka, e cila theksoi se Shqipëria e ka mbështetjen e Komisionit Europian dhe vendeve anëtare.
“Shqipëria ecën me hapa të sigurtë në rrugën drejt BE si nga përgatitja teknike dhe nga vullneti politik te reformave dhe angazhimit të qeverisë. Shqipëria ka marrë mbështetjen e BE sa i përket KE dhe vendeve anëtare. Shumë punë është përpara për tu bërë deri n 2027 por dhe më pas deri në fund të dekadës kur aspirojmë për tu bërë pjesë e BE”, tha Dhuka.
Madje Dhuka sqaroi se vendi ynë është gati për të nisur procesin e mbylljes së kapitujve në fund të këtij viti.
“Në 27 nga 33 kapituj, Shqipëria konsiderohet e përgatitur mirë ose në mënyrë të moderuar. Rreth 27 prej tyre, kanë arritur në një shkallë maturimi që konsideron si të përgatitur në mënyrë të moderuar.Gjatë këtij viti të jemi gati teknikisht për mbylljen e negociatave deri në 16 kapituj. Deri në qershor po përgatisim 7-8 kapituj. 3 të parët janë thuajse të maturuar, 30, 25, 26 përgëzime për negociatorët”, tha Dhuka.
Gjatë vitit të kaluar, Shqipëria i çeli negociatat për të gjitha grupimet e kapitujve, me një ritëm sistematik, një grupim çdo 2-3 muaj.
