Në një takim për ecurine e paktit për universitetin, kryeministri Edi Rama ka akuzuar sërish rektorin e universitetit të Tiranës, Mynyr Koni, i cili sipas tij nuk po i përgjigjet kërkesave të studentëve pas protestës.
“Rektorin e UT e keni zgjedhur ju, nuk e kemi zgjedhur ne dhe ka detyrimin të përgjigjet para zgjedhësve të vet, por ka dhe fatin që zgjedhësit e vet kur duhet të përgjigjet ai nisen për te ministria dhe ai rri atje. E them për herë të tretë, më vjen keq që flas kështu, por s’ka mënyrë tjetër për të folur. Ai nuk është mbret, por është më rehat se çdo mbret. Unë besoj personalisht që ligji i ri i arsimit të lartë, fuqia që ligji i jep senatit, fuqia që ligji i jep strukturave të tjera janë të mjaftueshme, pa llogaritur fuqinë e studentëve që rektori të reagojë brenda 24 orësh. Kjo është rruga më e shëndeteshme. E vetmja gjë që nuk ka pësuar asnjë lëvizje nga gjithë ajo që u krijua si potencial nga protesta e studentëve është xhaketa e rektorit të UT. Se ka ndodhur se s’ka ndodhur protesta, i vetmi që nuk e ka marrë vesh dhe akoma nuk e di që ka pasur protesta është xhaketa e rektorit.”
Kryeministri theksoi edhe njëherë se problemet e ngritura nga studentët ka për detyrë t’i zgjidhe rektorati dhe jo qeveria.
“Ka një raport shumë problematik për rektorin. Keni parasysh si ndodh procedura, ministrja e Arsimit ka të drejtë që të kërkoja shkarkimin e rektorit dhe ebën për 30 ditë, kohë që i jepet Presidentit për të vendosur nëse e pranon ose jo këtë gjë. Unë nuk e përjashtoj që kjo të ndodhë, por e përsëris prapë, nuk është se duan ne të shkarkojmë përgjegjësinë tonë, t’u themi juve shkoni ju atje, kjo realisht është cështje e qeverisjes së universiteteve. Unë nuk e di cfarë bëjnë senatet dhe këshillat nëse pengohet investimi i rikonstruksionit të një fakulteti?!”
Sipas Ramës, edhe biblioteka digjitale e universitetit është e paaksesueshme për shkak të rektoratit. Ndërkohë në këtë takim nuk kanë munguar as batutat për kryedemokratin Basha.
