Kreu i Partisë së Lirisë, Ilir Meta ka akuzuar Partinë Socialiste se po përdor krimin për të intimiduar votuesit.
Sipas Metës, ish aleati i tij, kryesocialisti Rama personat e inkriminuar i ka emëruar në poste zyrtarësh të lartë.
“Nuk kemi asnjë arsye që t’i trembemi asnjë elementi kriminal që nxit Edi Rama, por ata duhet të kenë parasysh që Edi Rama këtë zakon ka i shtyn të tjerët në këtë rrugë edhe pastaj i lë në baltë për të shpëtuar veten e vetë apo për të zgjatur agoninë e vetë. Edi Rama nuk rri dot pa nxitur elementë të krimit, ai i futi në parlament, i bëri kryetarë bashkie, i ka bërë drejtorë, ai që vodhi shtëpinë e Benzema u bë drejtor. Kryetari i Bashkisë së Mirditës dha dorëheqjen dhe tha që të jesh kryetar atje duhet të kesh qenë në burg, duhet të kesh bërë ose një plagosje ose një vrasje”, tha Meta.
I pyetur lidhur me kostot elektorale që mund t’i faturohen Partisë së Lirisë nga konflikti me Lefter Kokën, që ka qenë faktor elektoral në Durrës dhe tani ndodhet në burg nga denoncimi i këtij subjekti politik, Meta përgjigjet se në fakt Koka është thjesht ‘kokë turku’ e kryeministit Rama.
“Nëse kemi një situatë të tillë ajo është për shkak të zbatimit që ai iu ka bërë porosive të paligjshme të Edi Ramës, sepse Edi Rama aty i shtyn të gjithë bashkëpunëtorët e tij për përfitimet e veta dhe i bënë kokë turku”, theksoi Meta.
Nga ana tjetër, Meta theksoi se Durrësi pas 20 vitesh nën qeverisjen e Partisë Socialiste duhet të bëjë kthesë, pasi gjatë këtyre viteve qyteti bregdetar është shkatërruar nga keqqeverisja.
