Rama për vizitën e Kerry-t

Kryeministri Edi Rama e ka cilësuar mjaft të rëndësishme lajmin e dhënë nga Departamenti Amerikan i Shtetit se John Kerry do të vizitojë Shqipërinë në datën 14 shkurt. Me anë të një statusi në rrjetin e tij social që në orët e para të mëngjesit të së premtes Rama shkruan: “U zyrtarizua vizita e Sekretarit të Shtetit John Kerry në Tiranë: 14 shkurt; vizitë shumë e rëndësishme në një kohë sfidash të përbashkëta!”. Përmes një njoftimi zyrtar pasditen e së enjtes, Departamenti Amerikan i Shtetit bëri të ditur se Sekretari i Shtetit, John Kerry, do të vizitojë Tiranën më 14 shkurt. Kerry vjen në Shqipëri pas qëndrimit në Mynih të Gjermanisë, ku do të marrë pjesë në samitin e sigurisë, që mbahet nga data 12-14 shkurt. Dhjetorin e kaluar Kerry zhvilloi turneun e tij të parë ne cilësinë e sekretarit të shtetit në disa vende ballkanike. Ai vizitoi Kosovën, Serbinë dhe Greqinë.