Kryeministri i Shqipërisë, Edi Rama, është ndalur sërish te protesta në vend. Në një intervistë për median britanike “UnHerd”, Rama është shprehur se protesta nuk është më e njëjtë me atë të muajit qershor.
Rama është shprehur se gjatë muajve të fundit në protestë janë përfshirë më shumë parti politike dhe grupe të opozitës, përfshirë edhe forca të ekstremit të majtë dhe të djathtë.
Megjithatë, kreu i qeverisë shqiptare është shprehur se, pavarësisht tensioneve, ai është “shumë krenar” që protestat kanë zhvilluar për ditë me radhë në mënyrë kryesisht paqësore.
Sipas kryeministrit, fakti që qytetarët mund të protestojnë në bulevard pa u penguar tregon se Shqipëria po sillet si një vend normal evropian, ku protestat janë pjesë e jetës demokratike.
“Protestat e sotme nuk janë protestat e qershorit, kështu që njerëzit që folën sot janë të ndryshëm. Ata janë të angazhuar në parti politike. Ata janë të angazhuar në parti opozitare, parti të vogla opozitare, të majtë nga ekstremi dhe të djathtë nga ekstremi. Ndërsa protestat e qershorit ishin të ndryshme, ishin më të mëdha, shumë njerëz që votuan për ne ishin atje. Sidoqoftë, jam shumë, shumë krenar që kemi pasur një protestë kaq të madhe për ditë të tëra në një mënyrë shumë paqësore dhe se askush nuk u lëndua, askush nuk u ndalua të bënte atë që donte. Në fund të fundit, kjo protestë tregon një vend që është si një vend normal evropian ku ka protesta”, tha Rama.
Më tej, numri një i qeverisë ka theksuar se rrjetet sociale kanë luajtur një rol të madh në mobilizimin e protestuesve.
“Algoritmi bëri shumë për t’i sjellë njerëzit në bulevard”, tha Rama, duke argumentuar se lidhja e protestave me Kushnerin dhe familjen Trump ka bërë që ato të marrin më shumë vëmendje ndërkombëtare.
Sipas tij, kjo çështje ka tërhequr edhe persona që janë kundër Donald Trump dhe e kanë amplifikuar protestën në rrjetet sociale.
Në lidhje me projektet në Zvërnec dhe Sazan, Rama ka mbrojtur më herët qëndrimin se protestat nuk duhet të interpretohen si provë se projektet kanë nisur apo se janë cenuar tashmë zonat e mbrojtura.
