Rama: Numërohen qindra dëshmorë në uniformat blu! Mirënjohje për Policinë e Shtetit
Kryeministri Edi Rama mbajti fjalën e tij në takimin me ish-punonjës të Policisë së Shtetit, Gardës, AMP-së dhe Shërbimit Zjarrfikës, sot në pension, për të shprehur mirënjohjen dhe për t’u uruar festat e fundvitit.
Kreu i vendit tonë përmendi se shumë oficerë kanë humbur jetën gjatë detyrës së tyre.
Kryeministri theksoi se dëshiron të rrisë pagat dhe të përmirësojë kushtet për Policinë e Shtetit.
Rama: Ju jeni një kategori e shërbëtorëve të këtij shteti. Nuk ka një kategori tjetër të shërbëtorëve të shtetit që kanë humbur jetën për shkak të detyrës, siç është rasti i Policisë së Shtetit. Numërohen sot 227 dëshmorë në uniformat blu. Gati-gati nuk të besohet që ky është një numër që korrespondon me demokracinë.
Trupat e policisë e humbnin jetën gati-gati si diçka që ishte pjesë e punës. Nuk e harroj dot atë kohë, kur ishim në opozitë, dhe shkonim herë pas here te godina e selisë së PD-së, ish-shtëpia e ushtarakëve, për të bërë homazhe. Aty mblidheshin kolegë, shokë dhe drejtues të policisë. Kjo e bën edhe më të madhe detyrën për të qenë mirënjohës ndaj jush. Jo vetëm që shërbyen, por shërbyen në një kohë kur Policia e Shtetit ishte e tradhtuar nga vetë shteti.
Pensionistët, me reformën e bërë, janë trajtuar si të njerkës, ndërkohë që më parë kanë qenë trajtuar po si të njerkës. Mjafton të shohësh kolona të të njëjtave kategori para dhe pas vitit 2014: pensioni me pagë të ndryshme. Ju e shikoni vetë dhe e ndiqni vetë, Policia është si një skuadër; edhe pasi ke mbaruar së luajturi, je i lidhur me të.
Ne duam të rrisim pagat, të përmirësojmë kushtet dhe të përmirësojmë teknologjinë e Policisë së Shtetit. Ju jeni baza mbi të cilën është ndërtuar më tej muri i Policisë së Shtetit. Do të bëjmë më të mirën dhe do të veprojmë për të sjellë më shumë në familjet tuaja nga çfarë do të sjellë më tej ekonomia jonë.
