Kryeministri Edi Rama e përqëndroi fushatën e tij elektorale këtë të hënë në Korçë. Gjatë një bashkëbisedimi me qytetarët, kreu i qeverisë vuri në dukje mungesën e investimeve në këtë qytet tetë vite më parë, kur vendi qeverisej nga PD-ja.
Sipas tij, Rilindja Urbane, ishte programi që solli zhvillimin e qytetit, duke hapur rrjedhimisht edhe vende të reja pune.
“Falë Rilindjes Urbane në Korçë janë hapur shumë sipërmarrje, të vogla që zhvillohen dita ditës, kanë krijuar punë për familjet që kanë transformuar shtëpitë e tyre në bujtina por edhe për të tjerët. Korça është bërë një hapësirë vibruese për ekonominë locale. Nëse sot flasim për Korçën si një destinacion turistik na duket normale, por disa vite më parë, para se ne të merrnim mandatin e parë, flisnin ne për të ardhmen e këtij vendi, për turizmin. Turizmi ishte një fjalë e pa mbështetur.
Ai foli dhe për synimet dhe planet ambicioze të PS.
“Këtu është vendi i duhur për të thënë që ambicia jonë në vizionin Shqipëria 2030, është që ta bëjmë Shqipërinë kampione të turizimit, të eksportit bujqësor dhe agroturizimit. Është krejtësisht i mundur dhe tashmë ka hyrë në rrugën e realizimit të tij. Nëse flasim për investime të mëdha, mund të flasim për Durrësin, do ta bëjë kompania e huaj portin më të madh në Mesdhe, në Vlorë e Sarandë ku aktualisht është në kantier. Nëse flasim për dy portet e tjera gjithashtu. Këto janë investime. Në këto dy mandate ne kemi ndërtuar një platformë të re që do ta ngremë Shqipërinë në një tjetër nivel.”
