Në krye të kandidaturave të turpshme të koalicionit të udhëhequr nga Partia Demokratike, për qarkun e Durrësit, Edi Rama rendit, të parin e listës, Edi Palokën, aleatin e Partisë Agrare Ambientaliste, Agron Dukën, dhe një të tretë emrin e të cilit kryeministri nuk e përmend, por thotë se është një trafikant droge.
“Po çfarë është ky trikëndësh që është krijuar këtu midis Palokës, Gon Dukës dhe një trafikanti heroine, i kapur, i dëbuar nga Zvicra, që tund dy gishtat e që shfaqet si alternativë. Për kë? Me Palokën për t’ju vënë gjoba. Për t’ju shkuar i dehur e për t’u kërkuar para për bixhox.”
Po aq pa ambicie e vlerëson ekipin e kundërshtarit sa mes emrave të kandidatëve për deputet nuk gjen një përfaqësues të numrit te madh të familjeve dibrane, qytetarë prej dekadash të Durrësit.
“Kjo është një tallje, duke ju ofruar këtë milet që duhet mbajtur poshtë tavolinës, se të turpëron tavolinën. Pa llogaritur që bashkë me këta, është dhe një “ambasadore” e Monës dhe e Lilos. Një “ambasadore” që vjen drejtpërdrejtë nga nuk e di se ku dhe kërkon vota këtu në Durrës.”
Në prezantimin e kandidaturave për Durrësin, e pranishme ishte edhe Eglantina Gjermeni. Pas tërheqjes së saj për zgjedhjet e 25 Prillit, Edi Rama tha se do të vazhdojë të jetë pjesë e ekipit të socialistëve por në detyra të tjera. Për Durrësin, kryeministri premton të njëjtën vëmendje si për Vlorën, shndërrimin e qytetit bregdetar përmes investimeve të rëndësishme.
Unë nuk i them dot atyre në Vlorë që ju më doni më shumë, sepse edhe ata më duan shumë, por kur të numërojmë votat, kush do më dojë më shumë, do më ketë prezent.
