Kryeministri Edi Rama ndodhet në Barcelonë, Spanjë. Ditën e sotme kreu i qeverisë shqiptare do të marrë pjesë në mbledhjen e katërt të samitit ndërkombëtar “Në Mbrojtje të Demokracisë”.
Sipas njoftimit zyrtar, samiti në Barcelonë do të përqendrohet në tema kyçe si forcimi i institucioneve demokratike, multilateralizmi, dezinformimi dhe teknologjia digjitale.
Një vëmendje e veçantë pritet t’i kushtohet rregullimit të mjedisit dixhital për të luftuar dezinformimin, si edhe reduktimit të pabarazive si bazë për demokraci të qëndrueshme.
Në kuadër të qëndrimit në Spanjë, Rama pritet të zhvillojë edhe takime bilaterale me kryeministrin Pedro Sanchez, si dhe me Presidentin e Këshillit Evropian, António Costa.
