Kryeministri Edi Rama duke folur gjatë një takimi me gratë në Korçë deklaroi sërish se në 11 maj shqiptarët kanë takim me historinë.
Ai theksoi se 11 maji nuk është një ditë e zakonshme, por një ditë ku shqiptarët duhet të votojnë për të mirën e përbashkët dhe atë të kombit, apo për interesin e një familjeje të vetme.
“Në 11 maj shqiptarët kanë takim me historinë. Në 11 maj zgjedhja është mes interesit të një kombi të tërë dhe të një njeriu të vetëm. Është mes interesit të një kombi të tërë dhe një familjeje të vetme. Është me Shqipërinë në BE apo me Shqipërinë në Kënetën e Bufit. Kjo zgjedhje është shumë e qartë se pse, pasi sot për herë të parë që nga rënia e komunizmit, BE nuk mjaftohet duke thënë se një ditë ju do jeni pjesë e jona, por ka hapur derën për të mbyllur negiociatat deri në 2027. Për herë të parë kemi një afat të vendosur bashkarisht”, deklaroi Rama.
