Kryeministri Edi Rama ka mbledhur në godinën qeveritare Komitetin Ndërministror të Emergjencave Civile për të analizuar dhe menaxhuar situatën e krijuar nga përmbytjet në disa zona të vendit.
Gjatë fjalës së tij, Rama theksoi se bëhet fjalë për një fenomen që ka prekur jo vetëm Shqipërinë, por gjithë rajonin dhe një pjesë të Europës, si pasojë e ndryshimeve klimatike. Ai nënvizoi se në kushte të tilla prioritet nuk është gjetja e fajtorëve, por ndihma e menjëhershme për qytetarët e prekur.
Në mbledhje morën pjesë ministritë përgjegjëse për menaxhimin e emergjencave, përfshirë Ministrinë e Mbrojtjes, të Brendshme, të Financave, si dhe dikasteret e Energjisë, Infrastrukturës dhe Bujqësisë, së bashku me përfaqësues të Agjencisë Kombëtare të Mbrojtjes Civile.
Një nga çështjet kryesore të diskutuara ishte edhe paketa e dëmshpërblimeve, e cila do të mbulojë familjet, bizneset dhe fermerët që kanë pësuar dëme, veçanërisht në tokat bujqësore.
Kryeministri paraqiti një bilanc paraprak të dëmeve, duke theksuar se reshjet intensive të ditëve të fundit, të kombinuara me ndërhyrjet njerëzore në mjedis, kanë rënduar pasojat. Sipas të dhënave zyrtare, në rang vendi janë evidentuar 1 587 banesa me prani uji, janë evakuuar 339 persona nga 51 familje, ndërsa uji ka prekur rreth 13 211 hektarë tokë bujqësore. Po ashtu, janë raportuar probleme edhe në disa institucione shëndetësore dhe arsimore.
“Në të gjithë vendin janë ulur sasitë e reshjeve të matura deri së fundmi, përjashtuar Durrësin ku janë regjistrua 41 mm shi, një punonjës i bashkisë së Durrësit, 54 vjeç, është gjetur i mbytur pasi është raportuar i vdekur një ditë më parë. Deri tani janë në rang vendi, numëruar 1587 banesa me praninë e ujit, janë evakuuar 339 persona dhe 51 familje, po ashtu prania e ujit është konstatuar në 13211 hektarë tokë bujqësore ku një pjesë janë përmbytur, sikundër edhe disa qendra shëndetësore apo arsimore. Sasia e reshjeve ka qenë e jashtëzakonshme, deri në 300 mm, ose thënë ndryshe, më shumë sesa sasia mesatare e reshjeve që bie gjatë gjithë muajit. Reshjet 30-ditore mesatare të janarit kanë rënë në një periudhë 4-ditore, një fenomen që po bëhet i papritur në të gjithë botën. Në disa zona të Ultësirës Perëndimore, sasia e reshjeve në këto 5 ditë ka qenë 25% ose sa çereku i sasisë vjetore në mesatare. Si pasojë e një rritjeje të tillë ujore, në kanalet e larta, kolektorët kryesorë kullues, përrenj malorë dhe lumenjtë Drin, Bunë, Mat, Drojë, Ishëm, Shkumbin, Erzem, Osum, Seman dhe Vjosë, ka ardhur pasoja e përmbytjeve pavarësisht infrastruktruës së ripërtërirë si rezultat i investimeve të vazhdueshme në dekadën e fundit”, tha Rama.
