Ish-presidenti Bamir Topi shfaqet i bindur se po tentohet që të mos i jepet askujt e drejta për të konkurruar, me argumentin se ka një tendencë për të zotëruar një drejtim monopol.
I ftuar në emisionin “Kapital”, Topi shtoi se nuk sheh asnjë lloj ndryshimi nga sistemi komunist nëse veprohet në këtë linjë.
“Meta sot është njeriu që së bashku me kryeministrin dhe kryetarin e opozitës kanë informacion më të plotë se cfarë ka ndodhur. Është krijuar një biom problematik President-Kryeministër. Zërat e ambasadorëve janë këtu, nëse ka një problem. Duhet të merremi specifikisht me reformën zgjedhore, sepse ka hetime të forta me zë dhe figurë se si janë blerë zgjedhjet. Jam i bindur që këta duan ta mbajnë këtë drejtim monopol, pa i dhënë të drejtën askujt që të konkurrojë. Nëse shkojmë në këtë linjë, nuk shoh asnjë lloj ndryshimi nga komunizmi, pasi nuk ke mundësi zgjedhje. Kur ankohet Presidenti, imagjino ku është institucioni i referendumit. Emri është demokraci parlamentare, në fakt kemi Republikë Kryeministrore. Po e çon në ekstrem. Ka filluar me Berishën që i mori të tëra fuqitë e pushteteve. Kur unë drejtoja kishte një lloj ekulibri institucional.”
Po ashtu, ai nuk la pa kritikuar edhe kryeministrin Edi Rama, për të cilin tha se kërkon të kontrollojë të gjitha pushtetet.
“Kam kritika pa fund për kryeministrin. Edhe ne kushtet kur një opozitë largohet, ti nuk mund ta shfrytëzosh në ekstrem këtë lloj mundësie. Ky njeri nuk është fare i ndjeshëm, a janë të tjerët të pranishëm apo jo. Nuk mund t’i mbash të gjitha pushtetet.”
