Pak ore pas pezullimit të Drejtorit të Përgjithshëm të Policisë Haki Çako, kryeministri Rama i ka kërkuar ndjesë publike qeverise italiane. Në një deklaratë zyrtare, Rama falenderon vendin fqinj per ndihmën e dhëne edhe përmes misionit Interforce, ndërsa thekson se Prokuroria nuk duhej te ishte përfshire ne nje makinacion politik.
“Kjo qe ndodhi është e pajustifikueshme dhe për Shqipërinë është një tjetër kambanë që bie për emergjencën kombëtare të Reformës në Drejtësi. Mbroj fort pikëpamjen se shpjegimet e dhëna nga Italia përmes ambasadorit italian, pa asnjë detyrim, por vetëm si shprehje e miqësisë së sinqertë dhe vullnetit më të mirë, për të vendosur nën dritën e fakteve legjendën politike të përgjimeve, duhet të kishin mjaftuar që institucioni shqiptar i akuzës të mos përfshihej në një makinacion kaq të rëndomtë politik. Por fatkeqësisht nuk ka ndodhur kështu dhe sot, miqtë e partnerët tanë të provuar në çdo ditë të vështirë të Shqipërisë së këtyre njëzetë e pesë vjetëve, kanë të drejtë të ndjehen të lënduar nga përfshirja e tyre indirekte në një hetim absurd si edhe, më zi akoma, nga veprimi ekstrem që ka ndërmarrë sot Prokuroria”.
Sipas Ramës, kjo çudi e Prokurorisë e ka dëmtuar jo pak vazhdën e bashkëpunimit të shkëlqyer me Italinë. Shefi i qeverise i parapriu ndjesës publike kur ne nje aktivitet te ditës, foli per institucione te dobëta.
“I jam mirënjohës ambasadorit italian, e di që nuk është një ditë pozitive, por jo për fajin e tij dhe të qeverisë italiane, por për kusuret e shtetit tonë që nuk është akoma një shtet me institucione serioze, por ama prania e tij këtu për një investim që është i një sipërmarrje privat italiane është shprehje e qartë e vendosmërisë për të çuar përpara një marrëdhënie të shkëlqyer”.
Por lideri i opozitës Lulzim Basha e ka quajtur nje skandal te madh çështjen e përgjimeve, duke kërkuar largimin e ministrit Tahiri.
“Hapi i parë është dhe duhet të jetë firmosja nga Edi Rama e pezullimit të Drejtorit të Përgjithshëm të Policisë së Shtetit, largimi i tij nga detyra. Hapi i dytë, largimi i Ministrit të Brendshëm dhe hapi i tretë, deklarimi para shqiptarëve, se nuk ka asgjë për të fshehur dhe se është gati që këtë çështje t’ia nënshtrojë plotësisht drejtësisë dhe prokurorisë pa pengesa politike, pa presion ndaj hetimit”.
Por sipas Bashes kryeministri e ka treguar deri me tani se nje drejtësi e pavarur nuk i intereson, veçanërisht kur flitet per aferat ku janë përfshire anëtare te kabinetit te tij.
“Edi Rama i trembet një hetimi të pavarur dhe përgjegjësive politike që do të nxjerrë në raport me skandalin e përgjimit. Ndaj, edhe dje, edhe sot, ngurron të japë konsensusin e tij për një projekt drejtësie të pavarur dhe të pakapur politikisht. Ndaj pengon çdo reformë që do të mundësonte që në skandale të tilla drejtësia të vepronte paanësisht dhe pa pengesë”.
Qysh ne krye te herës, opozita e ka konsideruar çështjen e pajisjes se përgjimit si nje skandal, duke akuzuar qeverinë se ka përgjuar krerët e shtetit, diplomatet e drejtuesit politike ne vend.
