Kryeministri Edi Rama u takua në Berlin, me Ministrin e Jashtëm gjerman, Sigmar Gabriel, nga i cili mori vlerësimin për reformat integruese dhe garancinë për vazhdimin e mbështetjes së fortë për aspiratën e shqiptarëve për anëtarësim në Bashkimin Europian.
Temë e bisedës ishin dhe zhvillimet në rajon dhe roli i Shqipërisë si faktor paqeje dhe stabiliteti.
Kryeministri Rama u shpreh për mediat pas takimit se ky takim “është jo vetëm kënaqësi, por edhe një nder i veçantë që të takohemi përsëri dhe një mundësi për të shprehur edhe një herë, mirënjohjen për mbështetjen e pakursyer të Gjermanisë ndaj Shqipërisë dhe rajonit.
Rama shprehu mirënjohje, “posaçërisht edhe për reformën themelore në drejtësi, ku falë mbështetjes suaj dhe mbështetjes së partnerëve të tjerë, ne jemi në një proces shumë të avancuar.
“Shpresojmë shumë që të jemi në lartësinë e sfidës, për të filluar zbatimin e reformës përmes Vettingu-t të gjyqtarëve dhe prokurorëve. Ashtu sikundër kërkohet dhe mirëkuptohet në rekomandimin e Komisionit Europian, për të mundur pastaj që të çelim negociatat me BE-në. Edhe një herë, shumë faleminderit dhe kini besim se Shqipëria, shqiptarët janë një partner shumë i angazhuar për këtë marrëdhënie kaq të veçantë që është marrëdhënia e Gjermanisë me Shqipërinë dhe rajonin”, tha Kryeministri Rama.
Ministri i Jashtëm i Gjermanisë, Sigmar Gabriel theksoi se, “ne duam ta çojmë përpara përafrimin e Shqipërisë me Bashkimin Europian. Plani qëndron tashmë në tavolinë. Unë dua t’ju falenderoj për reformat që tashmë jeni duke kryer dhe për angazhimin tuaj personal dhe qëndrimin tuaj në qetësimin e konflikteve në vendet fqinje”.
Gabriel u shpreh se, ‘Në prag të proceseve zgjedhore e dimë që reformat nuk janë të thjeshta dhe ne në Gjermani, këtë e dimë mirë e megjithatë dimë që shumica e shqiptarëve dëshirojnë stabilizimin dhe avancimin e mëtejshëm”.
Gabriel nënvizoi se, Shqipëria ka mundësinë e madhe historike t’i bashkohet Bashkimit Europian, por, nga ana tjetër, Europa ka mundësinë të bashkëpunojë me Shqipërinë dhe vendet fqinje të saj për paqen e stabilitetin dhe për këtë, ju jeni një garant.
“Ju falenderoj personalisht dhe ju uroj mirëseardhjen në Berlin”.i tha ai kryeministrit Rama .
