Kryeministri Edi Rama ka reaguar ndaj kritikave të shumta të hedhura ndaj vendimit të Ministres së Mbrojtjes, Olta Xhaxhka, për vendosjen e forcave të ushtrisë në aeroportin ndërkombëtar të Tiranës, “Nënë Tereza”, pas grabitjes së bujshme të së martës të sasisë së konsiderueshme prej 8 milionë euro.
Reagimin e tij shefi i qeverisë e ka bërë përmes një fotoje të hedhur në Instagram, që tregojnë forcat e sigurisë në aeroporteve ndërkombëtare të vendeve evropiane.
“Forcat ushtarake në aeroportet e Parisit, Venecias, Frankfurtit dhe Amsterdamit, janë vendosur ashtu si në plot vende të tjera të Europës dhe botës demokratike, si reagim ndaj akteve cënuese për sigurinë e infrastrukturave aeroportuale dhe qytetarëve që i përdorin ato. Ndërkohë beretat e kuqe të policisë sonë ushtarake janë vendosur thjesht në ruajtje të perimetrit të jashtëm të sigurisë. Prandaj kush flet për shkelje kushtetute, gjendje lufte, juntë ushtarake e marrëzira të tjera si këto, le të gjejë ndonjë arsye tjetër për të treguar se sa shumë i dhimbsen Kushtetuta dhe standardet demokratike”.
