Kryeministri Edi Rama komentoi marrëveshjen parazgjedhore të firmosur të hënën mes PD dhe LSI.
Sipas Ramës, kjo marrëveshje bëhet qartësisht për të “lidhur” kryedemokratin Lulzim Basha para zgjedhjeve.
Ai shtoi se Basha nuk ka guxim të reagojë për këtë situatë.
“Përsa i përket marrjes së drejtimit të opozitës kjo është e qartë për ata që shikojnë përtej asaj që duket, mjafton të shikojnë firmosjen e marrëveshjes së djeshme për të kuptuar planin. Plani është shumë i qartë. Pse u firmos marrëveshja dje? Për çfarë? Si mund të firmoset një marrëveshje nga dy parti që garojnë veç e veç? Keni parë në një vend të botës? Pse? Për çfarë? Është pjesë e planit për të lidhur Lulin me zinxhirin e Monikës për llogari të Saliut dhe Ilirit. Dhe pastaj, sigurisht, ose për të marrë pushtetin dhe për të shpërbërë reformën në drejtësi, ose për të marrë kokën e Lulit. Ka më thjeshtë se kaq? Është shumë e qartë pse e duan Lulin të lidhur para zgjedhjeve. Këtu problemi nuk është Ilir Meta. Në këtë pjesën e dytë. Këtu problemi është Lulzim Basha që nuk ka këllqe, s’ka karakterin e një lideri që të mos fshihet as kur i tregojnë se çfarë do t’i bëjnë të nesërmen, as kur aleati i tij i madh thotë unë amerikanët i kap për veshësh. Është e qartë. Por nuk mund t’ja kërkojmë sepse nuk është lideri, është thjesht menaxheri i një shoqërie aksionere, me dy ortakë, Ilir Metën dhe Sali Berishën dhe me një notere dhe përmbaruese, Monikën.”
