Rubena Hasa, 38 vjeçe, me detyrë faturiste e Operatorit të Shpërndarjes së Energjisë Elektrike në Tiranë ka rënë pre e dhunës gjatë ditës së sotme në momentet që ka shkuar në një lokal në rrugën “Artan Lenja” për të kontrolluar sahatin e energjisë.
E reja dyshohet se është sulmuar nga Spartak Cara, 38 vjeç menjëherë sapo është konstatuar, i cili është shpallur në kërkim nga policia.
Autori i dyshuar qërezulton me probleme të shëndetit mendor. Ai nuk ka patur njohje me faturisten, por dyshohet se për shkak të sëmundjes mendore të ketë ushtruar dhunë ndaj saj.
Sipas burimeve autori i dyshuar rezulton të ketë qënë i shtruar në spitalin psikiatrik në Tiranë ku është trajtuar për disa ditë.
Hasa u dërguar pranë Spitalit të Traumës në kryeqytet dhe mësohet se është e ndërgjegjshme, por bluzat e bardha po e mbajnë në kujdes të vazhdueshëm.
“Specialistët për Hetimin e Krimeve në Komisariatin e Policisë Nr. 2 shpallën në kërkim dhe punohet për kapjen e shtetasit S. C., 38 vjeç, banues në Tiranë.
Ky shtetas, me datë 25.04,2025, rreth orës 13:00, dyshohet se ka goditur me sende të forta për shkak të detyrës shtetasen R. H., 37 vjeçe (punonjëse e OSHEE-s) e cila kishte shkuar për të parë sahatin e dritave në lokalin që 38-vjeçari posedon në rrugën ‘’Artan Lenja’’.
Si pasojë është dëmtuar 37-vjeçarja, e cila ndodhet në spital, nën kujdesin e mjekëve.
Materialet procedurale iu referuan Prokurorisë, për veprime të mëtejshme”, thuhet në njoftim. /vizionplus.tv
