Kreu i Lëvizjes Bashkë, Arlind Qori, i ftuar në Quo Vadis të moderatores Pranvera Borakaj në Vizion Plus, ka komentuar akuzat e kryeministrit Edi Rama ndaj institucioneve të drejtësisë.
Sipas tij, Rama që nga momenti kur u arrestua Erion Veliaj ka nisur sulmet ndaj drejtësisë, pasi po e ndien se institucionet po i afrohen atij.
“Me arrestimin e Veliajt, Rama ka nisur sulmin ndaj institucioneve të drejtësisë. Shpjegimi politik që jepet është se institucionet e drejtësisë kanë shkuar shumë pranë tij. Veliaj dhe Balluku janë njerëzit më të afërt të tij. Ka një problem: nuk është hera e parë që një politikan në botë sulmon drejtësinë. Është rasti i Berlusconit apo i Trump-it në mandatin e parë. Por Rama nuk ka fabul, pasi Berlusconi thoshte se gjyqtarët janë komunistë, ndërsa Trump thoshte se ekziston ‘deep state’. Rama nuk thotë dot as që janë komunistë, as se ka ‘deep state’.
Pra, si t’ia bëjë tani që të sulmojë institucionin e drejtësisë, të cilin më herët e lavdëronte, duke thënë se ‘e kam bërë unë drejtësinë’? Problemi i tij, kur sulmon gjyqtarët, është se përpiqet të krijojë një fabul të gëlltitshme që opinioni publik të ketë dyshime, por nuk po ia del. Të gjitha akuzat e Ramës nuk ngjisin, sepse etja e qytetarëve për drejtësi, që të korruptuarit të mbajnë përgjegjësi, është jashtëzakonisht e madhe. Ai mund të shpikë pas një muaji një kauzë tjetër”, tha Qori.
