Qindra shqiptarë kanë hyrë dhe dalë nga Kapshtica në orët e fundit

Edhe gjatë 24 orëve të fundit numri i hyrje daljeve në pikën e kalimit kufitar të Kapshticës ka qënë i lartë. Burime zyrtare pranë drejtorisë vendore të kufirit dhe migracionit bëjnë me dije se në 24 orët e fundit përmes kësaj pike të kalimit kufitar kanë hyrë në vendin tonë 161 shtetas shqiptarë që do të karantinohen tashmë në banesat e tyre dhe jo më në hotele. Por ajo që vlen të theksohet është numri i lartë i shtetasve shqiptarë që kalojnë përmes pikës së kalimit kufitar të Kapshticës për të shkuar drejt Greqisë. 229 shtetas i janë drejtuar vendit fqinj. Një pjesë e mirë e tyre janë shtetas shqiptarë që kanë leje qëndrimi të përhershme në Greqi, ndërsa pjesa tjetër banorë të juglindjes që kanë siguruar një kontratë pune sezonale në vendin fqinj.