Qeveria në Shkup miratoi unanimisht këtë të hënë ratifikimin e marrëveshjes se Prespës për emrin e ri të Maqedonisë.
Hapi i radhës është dërgimi i saj në Kuvend. Kryetari i parlamentit Talat Xhaferri konfirmoi thirrjen e seancës të martën paradite dhe kalimin e projektligjit në komisionin përkatës, për shqyrtim. Pritet që debati të zgjasë dy ditë.
Për miratimin e marrëveshjes në parlament, nevojitet një shumicë e thjeshtë.
Sipas procedurave, ligji më pas dërgohet tek kreu i shtetit.
Presidenti Ivanov, i cili ka të drejtën e kthimit vetëm një herë, mund ta dekretojë ligjin në një afat prej 7 ditësh.
Ndërkohë situata para kuvendit u normalizua këtë të hënë, pas protestave të dhunshme gjate natës, kur tubuesit kundërshtuan marrëveshjen e nënshkruar me Greqinë.
Ministria e Brendshme bëri të ditur se 25 persona u ndaluan ndërsa 7 policë u plagosën gjatë përleshjeve me demonstruesit.
Ata përdorën pajisje shpërthyese dhe shtynë dhunshëm gardhin mbrojtës, ndërsa përpiqeshin të hynin me forcë në Parlament.