Kryetari i Bashkisë së Tiranës, Erion Veliaj inspektoi qendrën e re për shërbime komunitare në Vaqarr, ku bëri të ditur se do të jetë funksionale brenda muajit maj.
“Do të përgatisim të gjithë Njësinë Administrative të rikthehet në Vaqarr dhe pastaj do të jetë sfidë për komunitetin sesi do ta gjallërojmë me kulturë, rini dhe art. Është vetëm çështje pak vitesh derisa ta quajmë Vaqarrin një lagje të re, të bukur, të rindërtuar, më të fortë dhe më të madhe të Tiranës sonë moderne”, tha Veliaj.
Kryebashkiaku Veliaj tha se do të krijohen hapësira për dy varreza të reja në veri dhe në jug të Tiranës.
“Kemi 5 propozime nga të cilat do të zgjedhim dy: brenda këtij mandati Tirana do të ketë edhe dy varreza të reja, të projektuara me rrugica, me stola etj, që të jetë më shumë një park, për një moment reflektimi dhe prehje, se sa një tjetër stacion i kaosit urban, që trashëguam nga vitet ‘90-të”, u shpreh kryebashkiaku.
Kryebashkiaku kërkoi bashkëpunim për mos-bllokimin e punës për varrezat e reja. /vizionplus.tv
