Tiranë – Një tjetër rast i armëmbajtjes pa leje është goditur nga Policia e Tiranës. Shërbimet e Komisariatit të Policisë Nr. 6 kanë finalizuar me sukses operacionin policor të koduar “Trigger”, bazuar në informacionet e siguruara në rrugë operative, për një shtetas që lëvizte i armatosur në zonën e Astirit.
Gjatë operacionit, në rrugë, duke lëvizur në këmbë, u kap në flagrancë shtetasi D. S., 37 vjeç, banues në Lezhë, i cili mbante me vete një armë zjarri pistoletë me fishek në fole, të fshehur në çantën e tij personale.
Menjëherë pas ndërhyrjes, Policia sekuestroi armën e zjarrit si provë materiale dhe vuri në pranga 37-vjeçarin, i cili rezulton i dënuar më parë për veprën penale të vjedhjes.
Në përfundim të veprimeve procedurale, materialet iu referuan Prokurorisë pranë Gjykatës së Juridiksionit të Përgjithshëm Tiranë, për veprime të mëtejshme, në ngarkim të shtetasit D. S., për veprën penale “Mbajtja pa leje dhe prodhimi i armëve, armëve shpërthyese dhe municionit”.
/vizionplus.tv
