Pas presidentit amerikan Donald Trump, edhe ai rus Vladimir Putin ka uruar presidentin turk Rexhep Taip Erdogan për fitoren në referendumin e së dielës për ndryshimet kushtetuese. Dy liderët zhvilluan një bisedë telefonike gjatë së martës, ku diskutuan edhe për forcimin e marrëdhënieve dypalëshe dhe bashkëpunimin për arritjen e një armëpushimi në Siri.
Zëdhënësi i Putin, Dmitry Peskov deklaroi se Kremlini bën thirrje qe të respektohet zgjedhja e turqve në referendum për shtimin e pushtetit të presidentit Erdogan. Rusia e sheh atë si një çështje të brendshme të Turqisë. Më herët liderët europianë u treguan më të përmbajtur në deklarata.
Opozita në Turqi ka paraqitur ankesa dhe ka apeluar për anulimin e referendumit dhe këto ankesa do të shqyrtohen nga komisioni zgjedhor. Dy ditë më parë, vëzhguesit ndërkombëtarë arritën në përfundimin se referendumi në Turqi kishte parregullsi dhe nuk përmbushi standardet ndërkombëtare.
