Hakerat patriotë rusë mund të kenë ndërhyrë në zgjedhjet presidenciale amerikanë të vitit të shkuar. Deklarata është bërë nga presidenti rus Vladimir Putin, që gjithsesi ka mohuar që ata të jenë financuar nga Moska. Por për herë të parë, Putin pranon së ndërhyrja mund të ketë ardhur nga vendi i tij. Në Forumin Ekonomik të Shën Pjeterburgut, Putin i krahasoi hakerat me “artiste” që mund të veprojnë në emër të Rusisë, nëse mendojnë se interesat e saj po kërcënohen.
“Artistët mund të veprojnë në emër të vendit të tyre dhe të pikturojnë. E njëjta gjë ndodh edhe me hakerat, nëse shohin diçka për lidhjet mes shteteve. Nëse janë patriotë, ata kontribuojnë në një mënyrë që mendojnë se është e drejtë dhe luftojnë kundër atyre, që thonë gjëra të këqija për Rusinë”.
Rusia ka mohuar gjithnjë të kete ndikuar në zgjedhjen e presidentit amerikan dhe Putin i ka cilësuar akuzat provokime dhe gënjeshtra. Ai ka deklaruar gjithashtu se hakerat mund të bëjnë që aktiviteti i tyre të duket si i financuar nga shteti, apo që në raste sulmesh kibernetike të krijohet përshtypja se Rusia ishte burimi i tyre. Këtë e lejon teknologjia moderne. Por Putin i mbetet idesë se asnjë haker nuk mund te ndikojë në një fushatë elektorale në Europë, Azi, apo Amerikë, pasi nuk ndikon dot në mendjet e njerëzve apo të një shteti.
