Është publikuar traileri zyrtar i filmit biografik për Michael Jackson, me titull “Michael”, ku në rolin kryesor shfaqet nipi i tij, Jaafar Jackson.
Sipas përmbledhjes zyrtare, filmi rrëfen historinë e jetës së Michael Jackson përtej muzikës, duke ndjekur rrugëtimin e tij nga zbulimi i talentit të jashtëzakonshëm si lider i Jackson Five, deri te shndërrimi në një artist vizionar, ambicia krijuese e të cilit e shtyu drejt një përpjekjeje të pandërprerë për t’u bërë artisti më i madh në botë. Filmi hedh dritë si mbi jetën e tij larg skenës, ashtu edhe mbi disa nga performancat më ikonike të karrierës së tij solo në vitet e hershme, duke i ofruar publikut një vështrim të afërt mbi Michael Jackson si kurrë më parë.
Megjithatë, as nga përmbledhja zyrtare dhe as nga traileri nuk është ende e qartë nëse filmi do të trajtojë aspektet më të diskutueshme që shënuan vitet e fundit të jetës së yllit.
Filmi, me regji të Antoine Fuqua, ka gjithashtu në kast Miles Teller në rolin e avokatit dhe bashkëpunëtorit të ngushtë të Jackson, John Branca, Colman Domingo si babai i tij Joe Jackson, Nia Long si nëna e tij Katherine Jackson, dhe Jessica Sula si motra e tij LaToya Jackson.
Në film marrin pjesë edhe Larenz Tate si themeluesi i Motown Records, Berry Gordy, Laura Harrier si producentja muzikore pioniere Suzanne de Passe, Kat Graham si Diana Ross, si dhe Giuliano Valdi në rolin e Michael Jackson gjatë epokës së Jackson 5.
Filmi “Michael” pritet të dalë në kinematë botërore më 24 prill 2026.
/vizionplus.tv
