Deputeti socialist, Olsi Komici, i ftuar në Quo Vadis të moderatores Pranvera Borakaj në Vizion Plus, ka folur mbi atë që pritet të ndodhë në Kuvend më 12 mars, ku pritet të votohet nëse do t’i hiqet ose jo imuniteti deputetes Belinda Balluku.
Komici tha se grupi parlamentar i PS vendosi që të respektojë radhën e vendimeve të Gjykatës Kushtetuese, për të marrë më pas vendimin për votimin që do të japë ditën e enjte.
Pjesë nga biseda:
Borakaj: Më 12 mars do të përballeni me çështjen e imunitetit të zonjës Balluku. Pse u bë në këtë moment kaq i rëndësishëm prezumimi i pafajësisë për socialistët?
Komici: Ne si forcë politike, në lidhje me këtë proces, kemi vendosur të respektojmë radhën e vendimeve të Gjykatës Kushtetuese, për të ndërmarrë pastaj këtë proces në kuadër të një vendimmarrjeje konkrete të Këshillit të Mandateve. Tashmë dihet se do të dilet me dy qasje. Pse këtë herë qëndrimi i mazhorancës është kështu në këtë moment? Në dijeninë time, një ndër rastet është zoti Sali Berisha, i cili ka refuzuar disa herë vendimin e gjykatës. Në atë lloj pozite, vendimmarrja e Kuvendit ka qenë e detyrueshme për heqjen e imunitetit.
Borakaj: Po në raport me ligjvënës socialistë?
Komici: Herët e tjera kanë qenë fakte dhe prova të pakontestueshme. Në rastin konkret, faktet dhe provat unë nuk i di konkretisht; dosja është një sekret hetimor. Në lidhje me atë që na u relatua nga anëtari i Këshillit të Mandateve, ndodhemi para një situate konkrete që na çon në këtë vendimmarrje që do ta raportojmë në Parlamentin e Shqipërisë.
