Lufta në Lindjen e Mesme dhe Shqipëria ka qenë një nga pikat e diskutimit në studion e “Quo Vadis” mbrëmjen e kësaj të marte në Vizion Plus.
I ftuar në studio, ish-zv.ministri i Brendshëm Avenir Peka, tha se ky konflikt i ka fillesat që pas sulmeve të 7 tetorit të vitit 2023.
Sipas tij, pasi Izraeli dhe SHBA u siguruan që vendet e rajonit nuk do ta përkrahnin këtë të fundit, goditën regjimin.
Pjesë nga biseda:
Borakaj: Pse tani?
Peka: Është një proces që herët ose vonë do të ndodhë. Edhe Izraeli, edhe Irani e dinin që kjo do të ndodhte për shkak të qeverisë së Iranit në raport me mosnjohjen e Izraelit. Duke qenë regjim klerikal, kanë përdorur Izraelin për të krijuar legjitimitet të brendshëm. Gjithçka ka nisur me sulmet terroriste të 7 tetorit 2023 dhe mund të jetë nga ngjarjet me pasojat më me influencë të këtij shekulli. Për shkak të atyre sulmeve, Izraeli u fut në “proxy”-t e Iranit, një nga një, në të gjitha shtetet.
Borakaj: Ishte i provokuar në atë kohë?
Peka: Ajo ndodhi.
Borakaj: Ishte karrem?
Peka: Ne mund të aludojmë, por nuk kemi si ta dimë. Pikëpyetje e madhe është mungesa e gatishmërisë së Izraelit, kur shohim sot se çfarë është në gjendje të bëjë. Por sido të jetë, ai rast shërbeu si katalizator që Izraeli dhe SHBA të merren njëherë e mirë me rajonin; mund të ketë qenë edhe Irani nga mbrapa. Izraeli ishte në përfundim të negociatave të paqes me Arabinë Saudite dhe kjo nuk i leverdiste Iranit. Sapo ishte hedhur edhe ideja e korridorit indian, që lidhte Indinë me Arabinë Saudite e më pas me Europën. Pa hyrë në histori, u morën me Hamasin, Hezbollahun, u morën me regjimin në Siri, në Jemen po ashtu, dhe kur u siguruan që një sulm ndaj Iranit nuk do të sillte rrethim të Izraelit, u sulmua Irani.
