Partia Socialiste do të nisë procedurat parlamentare për shkarkimin nga detyra të kryetarit të KQZ-së Klement Zguri. Sekretari i përgjithshëm Taulant Balla, përmes një statusi në facebook, thotë se kuvendi duhet të shkarkojë Zgurin për shkelje të rëndë të ligjit për dekriminalizimin.
Argumenti bazohet në faktin se Zguri nuk ka respektuar ligjin në shqyrtimin e çështjes së kryebashkiakut të Mallakastrës, Agron Kapllanaj, duke mos respektuar afatet ligjore.
Sipas Ballës, duhej të ishte komisioni si organ kolegjial dhe jo kryetari si individ, struktura që duhej të shqyrtonte, brenda 10 ditëve, në mbledhje publike rezultatet e vendimit të prokurorisë.
Për socialistët, qëndrimi i Zgurit është shembull i patolerueshëm i njëanshmërisë politike dhe mungesës së profesionalizmit.
