Partia Socialiste do të rrëzojë kërkesën e SPAK për arrestimin e ish-numrit 2 të qeverisë Belinda Balluku. Në mbledhjen e Grupit Parlamentar të PS-së, Ulsi Manja paraqiti raportin e mazhorancës për kërkesën e Prokurorisë së Posaçme duke shpjeguar se nuk ka asnjë aryse për t’i hequr imunitetin deputetes Belinda Balluku.
Ndërkohë në këtë mbledhje të Grupit Parlamentar, kryeministri Edi Rama nuk i kurseu kritikat ndaj SPAK, duke u pozicionuar në mbrojtje të deputetes Balluku.
Kreu i Partisë Demokratike, Sali Berisha në një dalje për mediat akuzoi kryeministrin Rama se me këtë vendim po pengon integrimin e vendit në Bashkimin Evropian.
Berisha: Të nderuar qytetare dhe qytetarë, sapo dëgjuat tërkuzën koprolalike të Edi Ramës për Lubi Ballukun, në fakt elegjinë e tij për veten e tij dhe për Lubinë. Sot, Edi Rama hoqi çdo lloj maske dhe doli publikisht në mbrojtje totale duke vënë në peng Kushtetutën e vendit, ligjet e vendit, ndarjet e pushtetit dhe procesin e integrimit evropian. Edi Rama iu tha shqiptarëve sot se Belinda Balluku është e paprekshme. Se Skapi është një zero me bisht. Se drejtësia nuk ekziston. Dhe se ai nuk ka ndërmend të përfillë asgjë nga Kushtetuta dhe ligjet e vendit.
Ai mori në mbrojtje totale veten e tij sepse de facto Lubia nuk ka qenë asgjë tejtër veçse noterja apo regjistruesja e të gjitha vjedhjeve 25-vjeçare të këtij kryehajduti. Edi Rama sot sfidoi çdo shqiptar, sfidoi qytetarët shqiptarë. Të dashur qytetarë dhe qytetare, nuk është një sulm kryesisht nga Spakut, ndaj drejtësisë kjo që po bën sepse në këtë drejtim, drejtësia po përfaqëson ju, po përfaqëson ligjin dhe interesat tuaja.
Por ky është një sulm direkt ndaj jush, ndaj dinjitetit tuaj, ndaj lirive tuaja. Ky është një sulm me të cilin Edi Rama u thotë ju se ai qëndron mbi ligjin dhe se ai si një narkodiktator i vërtetë vendos në këtë vend për gjithçka dhe për çdo gjë. Ai, sot dëshmoi më shumë se kurrë se është i gatshëm t’i përdorë mandatet e tij të krimit si bajoneta kundër qytetarëve shqiptarë dhe interesave të tyre në tërësi. Dhe në veçanti për mbylljen e dyerve të integrimit të Shqipërisë në BE.
Berisha u bëri thirrje shqiptarëve që më datën 12 mars, kur në Kuvend të votohet kërkesa e SPAK për heqjen e imunitetit të Ballukut, të mblidhen dhe të protestojnë jashtë ambienteve të Parlamentit.
