Sot grupi parlamentar i Partisë Socialiste do të mbajë mbledhjen për leximin e raportit të pesë anëtarëve socialistë në Këshillin e Mandateve lidhur me kërkesën e SPAK për dhënien e autorizimit për arrestimin e ish-zëvendëskryeministres Belinda Balluku.
Hartimi i raportit i është besuar kryetarit të Komisionit të Ligjeve, Ulsi Manja. Taulant Balla ka kërkuar që në mbledhje të jenë të pranishëm të gjithë deputetët, ndërsa e pranishme pritet të jetë edhe vetë Balluku.
Njëkohësisht, kryeministri Edi Rama pritet të mbajë një fjalim në këtë mbledhje, ndërsa nuk dihet ende nëse ish-ministrja e Infrastrukturës dhe Energjisë do të marrë fjalën.
Ndërkohë, Rama ka njoftuar përmes një postimi në platformën X se mbledhja e grupit parlamentar do të transmetohet drejtpërdrejt.
“Sot në 10:00 do të jemi LIVE në Grupin Parlamentar për marrjen e qëndrimit ndaj kërkesës së prokurorit për kufizimin e lirisë së Belinda Ballukut”, shkroi Rama.
Sot në 10.00 do të jemi LIVE në Grupin Parlamentar për marrjen e qëndrimit ndaj kërkesës së prokurorit për kufizimin e lirisë së Belinda Ballukut.
— Edi Rama (@ediramaal) March 9, 2026
/vizionplus.tv
