Protesta paqësore e 60 mijë punonjësve, të cilët kundërshtojnë masat antikrizë në Belgjikë ka përshkallëzuar në përleshje mes policisë dhe tubuesve. Uniformat blu shmangën përplasjen trup më trup, duke vënë në rreshtin e parë automjetet me ujë me presion që shpërndan tubuesit. Gjithçka nisi pasi të paktën 100 persona të maskuar, të dalë nga radhët e protestuesve nisën të hedhin shishe, gurë dhe sende të tjera të forta drejt trupave të policisë. Fillimisht forcat e rendit përdorën gaz lotsjellës dhe më pas ujë me presion. Nga kjo përplasje u lënduan disa persona, mes te cilëve dhe dy policë, si dhe u ndaluan dhjetëra tubues të dhunshëm. Protesta në Bruksel nisi kundër shkurtimeve në shërbimet publike, edukim, si dhe per papunësinë dhe mungesën e llogaridhënies ndaj qytetarëve. Ata kërkojnë rrëzimin e të ashtuquajturit “ligji piters” i cili shkurton pagesat përtej orarit te punës dhe llogaritjen e tyre në fund të vitit. Shoqatat e punëtorëve theksojnë se nga politikat e tregtisë së lirë të kryeministrit aktual Carls Mishel në dy vitet e fundit, një familje belge fiton 100 euro më pak në muaj dhe premtimi i tij për rritje të vendeve të punës nuk është realizuar.
