Qeveria vendosi të hënën mbylljen e klubeve të natës, diskove, lounge bar dhe çdo lloj shërbimi të kësaj natyre.
Enri Jahaj nga Shoqata e Bareve dhe Restoranteve tha për “Vizion Plus” se i gjithë sektori është në një situatë kritike, por theksoi se nga ky akt normativ goditen kryesisht diskot verore.
“Klubet e natës dhe diskot ishin të mbyllura dhe vazhdojnë të jenë. Më të goditura janë diskot verore. Kanë bërë investime dhe prisnin këtë sezon të cunguar; tashmë i bie që të mos hapen dhe penalizohen. Restorantet po punojnë me 60 për qind nën kapacitetin, sepse nuk ka njerëz që të shkojnë dhe të punojnë në restorante. Edhe baret janë në një situatë kritike, i gjithë sektori është në një situatë kritike.”
Sipas tij, zgjidhja më e mirë në këtë rast nuk është protesta, por dialogu, ndërsa shtoi se përgjegjshmëria e njerëzve do të luante një rol thelbësor në parandalimin e virusit.
“Nuk kemi një zgjidhje reale, por zgjidhja për mua fillon nga secili prej nesh. Në do të zbatonim rregullat e distancimit , nëse do të vendosnim maskat do të kishim më pak raste. Unë mendoj që zgjidhja më e mirë në raste të tilla është gjithmonë dialogu, sepse nuk mund të zgjidhësh gjë duke protestuar dhe duke u bërë palë me dhunën . Zgjidhja gjendet nëpër tavolina, jo përmes protestave. Përsa kohë rajoni ka një hapje të masave, por individet janë më të rregullt, iu bëjmë thirrje individëve që të bëjnë kujdes dhe të zbatojnë masat.”
