Protesta përçan pedagogët/ Kaos në Tiranë dhe rrethe, disa në auditore dhe disa jashtë

Protesta e pedagogëve ka shkaktuar kaos në nisje të vitit të ri akademik 2022-2023.

Ndryshe nga vitet e kaluara, paralajmërimi i një pjese të pedagogëve për të bojkotuar mësimin në rast se qeveria nuk reagonte ndaj kërkesave të tyre, ka sjell edhe çoroditjen e studentëve.

Në disa fakultete në Tiranës, sidomos tek Shkencat e Natyrës por edhe tek Universiteti Politeknik, shumica e pedagogëve i janë bashkuar protestës për rritje pagash dhe kushte më të mira në auditore. Madje kauza e tyre është mbështetur edhe nga një pjesë e studentëve.

Mirëpo në fakultete të tjera nuk ka ndodhur kështu, dhe mësimi ka nisur normalisht në auditore që në ditën e parë.

E njëjta situatë, kaotike edhe në rrethe.

Në Shkodër dhe Elbasan, shumica e fakulteteve kanë vendosur të mos e nisin si zakonisht vitin e ri akademik, por kanë bojkotuar.

Në Durrës është organizuar protestë, por edhe aty pjesëmarrja e pedagogëve ka qenë jo e plotë, ashtu sikurse të ndarë mes tyre janë në stafin akademik të Gjirokastrës.

Të vetmet Universitete në rrethe që kanë nisur shkollën normalisht janë ato të Korçës dhe të Vlorës.