Më 6 prill qindra studentë shqiptarë të Jurisprudencës në Maqedoninë e Veriut dolën në një protestë masive për të kërkuar përdorimin e gjuhës amatare shqipe në provimet e diplomimit. Sipas tyre kjo e drejte ekzisiton ligjërisht, por nuk zbatohet ne praktikë.
Ministri i Punëve të Jashtme, Ferit Hoxha në një konferencë për shtyp deklaroi se Shqipëria ndjek vazhdimisht situatën dhe se përdorimi i gjuhës shqipe në Maqedoninë e Veriut është një e drejtë e garantuar kushtetuese që nuk duhet të vihet në diskutim.
Ai shtoi se kjo çështje duhet të trajtohet në mënyrë institucionale përmes dialogut, duke theksuar se si Shqipëria ashtu edhe Maqedonia e Veriut janë vende kandidate për anëtarësim në Bashkimin Evropian dhe se është e rëndësishme që situata të mos politizohet.
Sipas Hoxhës, zgjidhja duhet të vijë përmes dialogut dhe maturisë, ndërsa Shqipëria mbetet e angazhuar për paqen dhe stabilitetin në rajon.
Hoxha: Kur kam thënë që i kemi ndjekur më vëmendje, do të thotë që i ndjekim në vijimësi. Përdorimi i gjuhës shqipe në Maqedoninë e Veriut është një e drejtë e garantuar nga Kushtetuta. Kjo e drejtë nuk duhet të vihet në diskutim dhe nuk duhet të bëhet pengesë në praktikë. Është e rëndësishme që kjo çështje të adresohet në mënyrë institucionale, përmes dialogut. Si Shqipëria ashtu edhe Maqedonia e Veriut janë vende kandidate për anëtarësim në BE. Për ne është e rëndësishme që kjo çështje të mos politizohet, por të trajtohet me maturi. Këtu ne nuk jemi në asnjë garë për deklarata apo postura të panevojshme. Ne na intereson zgjidhja dhe zgjidhja vjen përmes dialogut. Shqipëria mbetet një partner i përkushtuar për paqen dhe stabiltetin në rajon.
