Politlogu, Ermal Hasimja ishte i ftuar mbrëmjen e sotme në një intervistë të shkurtër në edicionin qëndror të lajmeve në lidhje me protestën e pedagogëve dhe kërkesat e tyre ndaj qeverisë.
Hasimja mbështeti kërkesën e pedagogëve për rritje të pagave por nga ana tjetër ai tha se duhet të bëhet një menaxhim më i mirë i buxheteve të vetë universiteteve.
Ai tha gjithashtu se duhet të ofrohet më shumë cilësi në lidhje me mësimdhënien apo zhvillimin e projekteve.
“Mendoj që pedagogët në Shqipëri duhet të paguhen më mirë, po flasim për sektorin publik, pasi në universitetet private funskionon me logjikën e ofertë kërkesës.
Por kjo çështja e pagës duhet të shihet edhe në disa aspekte të tjera.
E para do duhet, siç kërkohen pagat, të kërkohet nga ana tjetër një menaxhim më i mirë i buxhetit të universiteteve. Dhe nga ana tjetër do duhet që pedagogët të kërkojnë edhe rritjen e punës së tyre. E dimë shumë mirë që në universitetet publike, puna e pedagogëve të lë shumë për të dëshiruar. Jam dakord me rritjen e rrogës por të kërkohet edhe më tepër cilësi.”
Aleksandër Furxhi: Ka një arsyetim nga pala qeveritare se automonia e universiteteve lejon hapsirën që pedagogët të bëjnë punë shkencore në kuadrin e kërkimeve edhe ndërkombëtarë, duke patur mundësi në rastin e suksesit, në rritjen e të ardhurave edhe personale.
Ermal Hasimja: “Patjetër që qëndron. Dhe mundësitë që kanë pedagogët sot, sidomos ata që janë më të rinj për të zhvilluar karrierën e vetë për atë që është tamam thelbi i punës kërkimeore i punës zhvillimore. Patjetër që mundësitë sot janë të pakrahasueshme me 10 apo 15 vite më parë. Mundësitë janë shumë të mëdha por nuk janë mundësi që i ofron shteti shqiptar por që pedagogët i gjejnë vetë”
Aleksandër Furxhi: Kanë kaluar rreth 5 vjet nga miratimi i ligjit për arsimin e lartë pas shumë debateve në atë kohë. A është më i mirë sot universiteti?
Ermal Hasimja: “Në thelbin e vetë, në reformën e financimit të arsimit të lartë, ligji nuk është zbatuar ndonjëherë në Shqipëri, unë mendoj që do të ishte shumë mirë të ishte zbatuar dhe kjo do t’ju jepje vetë universiteteve më shumë mundësi financimi por edhe kërkesë llogarie.
Sot kjo gjë nuk ka ndodhur fatkeqsisht. Universitetet vazhdojhnë të funksionojnë pak a shumë njësoj. Janë ishuj që kërkojnë nga njëra anë autonomi, por nga ana tjetër nuk ofrojnë ndonje gjë shumë të lartë në këtë drejtim.Duhet të shkojnë të dyja paralelisht, patjetër që duhet të paguhen më tepër por edhe të ofrojnë më tepër.”
