Protesta e PD-së, Koçiu: Berisha si Don Kishoti, lufton me koshat e mbeturinave! Ka kthyer partinë në repart zjarrvënësish
Ministrja në detyrë e Punëve të Brendshme, Albana Koçiu ka reaguar lidhur me protestën që po zhvillon Partia Demokratike dhe forcat e tjera opozitare mbrëmjen e sotme.
Koçiu e quan provokim të hapur faktin që protestuesit shkuan drejt godinës së Policisë së Shtetit me molotovë në duar.
Duke e quajtur Berishën “Don Kishot që lufton me koshat e mbeturinave”, thotë se e ka kthyer partinë e parë pluraliste në një repart zjarrvënësish.
Ministrja Koçiu: Të shkosh me molotovë në duar drejt godinës së Policisë së Shtetit nuk është një akt proteste, por një provokim i hapur dhe një dëshirë e ethshme për përshkallëzim, duke tentuar të delegjitimohet forca e ligjit përballë presionit të rrugës.
Marshojnë si çlirimtarë në rrugët e kryeqytetit, ndërkohë që janë po ata vetë që shqiptarët i kanë lënë jashtë rrugës së politikës me votë.
Duke u fshehur pas bandës së molotovëve, ky Don Kishot që grindet me koshat e mbeturinave si me mullinjtë e erës, e ka kthyer partinë e parë pluraliste në një repart zjarrvënësish.
Ky zjarr nuk djeg dot asnjë reformë dhe as të ardhmen europiane të Shqipërisë, por vetëm mbetjet e fundit të një opozite që nuk di më as kush është, as ku po shkon dhe as pse po bërtet.
