Kreu i Grupit Parlamentar të Partisë Socialiste, Taulant Balla ka reaguar për protestën e Partisë Demokratike të zhvilluar këtë të martë përpara Kryeministrisë.
Me anë të një postimi në rrjetet sociale, ai dënoi sulmet ndaj institucioneve dhe punonjësve të policisë gjatë protestave të Sali Berishës, duke thënë se ato po përdoren për të fshehur dështimin e opozitës.
Lexo edhe :
Ai theksoi se liria për të protestuar është e garantuar në Shqipëri, por nënvizoi se dhuna ndaj forcave të rendit nuk mund të justifikohet.
“Dy fjalë për fundin e protestave të bufit, ku sulmohen punonjësit e policisë dhe institucionet. Ndoshta për të fshehur me tym e flakë dështimin e tyre. Gjithmonë do të ekzistojë liria për të protestuar në Shqipërinë tonë. Por sa kohë ligji e thotë qartësisht, nuk duhet të ekzistojë liria për të goditur apo keqtrajtuar ata që kanë zgjedhur për të shërbyer në mbrojtje të sigurisë së qytetarëve. Duhet t’i mbrojmë ata që na mbrojnë dhe duhet të kujdesemi për ata që kujdesen për sigurinë e qytetarëve. Kjo është ajo që bën një shtet i drejtë dhe normal.
Rëndësia e detyrës që mbart uniforma e Policisë, duhet ta bëjnë shoqërinë të reflektojë, ndërsa drejtësia t’i bëjë shembull ata që godasin punonjësit e policisë. Policia i ka shërbyer dhe i shërben me devotshmëri atdheut dhe qytetarëve, përplaset çdo ditë me kriminelë e keqbërës. Policia ka derdhur gjak, në emër të misionit dhe betimit të saj. Gjaku i policisë është gjaku i shtetit. Kush ngre dorë kundër punonjësit të policisë, ka ngritur dorë kundër shtetit”, shkruan Balla.
