Kryeministri Edi Rama ka reaguar lidhur me protestën e opozitës në një postim në rrjetin social x. Rama dënoi dhunën e përdorur ndaj efektivëve të policisë.
Ai krahasoi protestën e së martës me tubimet e famëkeqit Robert Mugabhe të Zimbabves. Kryeministri sulmoi protestuesit duke thënë se i shkojnë mbrapa një tetëdhjetë e kusur vjeçari të damkosur e të lajthitur!
Teksa kërkoi drejtësi për policët e plagosur, kreu i qeverisë theksoi se këto protesta do ta marrin përgjigjen në zgjedhjet e ardhshme.
Edi Rama: Këto janë bombat artizanale me të cilat janë sulmuar dhe djegur e plagosur mbrëmë punonjësit e policisë, nga e vetmja parti politike në botën demokratike që ushtron dhunë dhe e dyta në historinë e botës së tërë – pas asaj të famëkeqit Robert Mugabhe të Zimbabves – që i shkon mbrapa një tetëdhjetë e kusur vjeçari të damkosur e të lajthitur! Uroj që drejtësia të bëjë drejtësi për policët e plagosur dhe të ndëshkojë pa ngurrim bartësit e këtyre armëve me kapacitet vdekjeprurës! Sa për fatin politik të këtij cikli të ri jashtënxjerrjesh në bulevard, ai do të shkruhet si zakonisht në zgjedhjet e vitit të ardhshëm me një disfatë ende më shembullore se sa të mëparshmet, ndërkohë që ne do të vazhdojmë pa u ndalur rrugën drejt Shqipërisë 2030 në Bashkimin Europian.
Policia ka arrestuar 21 persona lidhur me protetën, 4 prej tyre të mitur. Si pasojë e sulmeve me sende të forta, mjete piroteknike dhe molotov ndaj punonjësve të Policisë dhe godinave të institucioneve shtetërore, janë dëmtuar 16 punonjës policie, të cilët morën ndihmë mjekësore në spital dhe janë jashtë rrezikut për jetën.
Në cilësinë e provës materiale janë sekuestruar 22 molotovë të pashpërthyer dhe 3 shishe me lëndë të dyshuar djegëse benzinë, që janë gjetur nga shërbimet e Policisë, afër Kuvendit.
