Delegacioni i Bashkimit Evropian në Tiranë ka reaguar një ditë pas protestës së organizuar nga opozita, duke shprehur shqetësim për incidentet e dhunshme që shoqëruan tubimin.
Në një deklaratë të publikuar në rrjetet sociale, përfaqësia e BE-së thekson se e drejta për tubim paqësor është një element themelor i një shoqërie demokratike, por duhet të ushtrohet me përgjegjësi dhe në përputhje të plotë me sundimin e ligjit, duke garantuar sigurinë e të gjithë qytetarëve.
Delegacioni shprehet i shqetësuar për aktet e fundit të dhunës në Tiranë, të cilat, sipas reagimit, rrezikuan jetën e njerëzve. Në këtë kuadër, u bëhet thirrje aktorëve politikë të tregojnë vetëpërmbajtje dhe të kontribuojnë në një klimë të qetë dhe konstruktive.
“Delegacioni i Bashkimit Evropian thekson se e drejta për tubim paqësor është një shtyllë themelore e çdo shoqërie demokratike. Ajo duhet të ushtrohet me përgjegjësi, në respekt të plotë të sundimit të ligjit dhe të sigurisë së të gjithë individëve.
Në këtë kontekst, Delegacioni i BE-së shpreh shqetësim për aktet e fundit të dhunës në Tiranë, të cilat rrezikuan jetë njerëzish.
Delegacioni i BE-së u bën thirrje aktorëve politikë të tregojnë vetëpërmbajtje. Ne mbështesim angazhimin konstruktiv në funksion të reformave të rëndësishme në rrugën e Shqipërisë drejt Bashkimit Evropian.”, thuhet në reagimin e BE-së.
BE-ja rikonfirmon mbështetjen për angazhim konstruktiv në funksion të reformave kyçe, në kuadër të procesit të integrimit të Shqipërisë në Bashkimin Evropian.
Ndërkohë, lidhur me incidentet gjatë protestës, autoritetet kanë arrestuar katër persona, të cilët akuzohen për hedhjen e molotovëve.
/vizionplus.tv
