Familjet që kanë blerë një apartament në një pallat të pa hipotekuar nuk do të jetojnë më me frikën se kanë shpenzuar për një shtëpi që nuk e zotërojnë. Ky proces ka nisur në kryeqytet, ku edhe numri i pallateve të pa hipotekuara është me i madh se në rrethet e tjera. Ka qenë kryebashkiaku Erion Veliaj që ka shpërndarë sot 1352 certifikatat e para të pronësisë për banorët që jetojnë në këto pallate. Veliaj theksoi se procesi i hipotekimit të apartamenteve do t’i ndihmojë shumë këto familje për të investuar dhe për të siguruar të ardhmen. I pranishëm gjatë këtij takimi me familjet përfituese ka qenë edhe ministri i Drejtësisë Ylli Manjani, i cili u bëri thirrje qytetarëve që të mos pranojnë të nënshkruajnë asnjë kontratë pronësie, përveçse tek zyra e noterit. E ndërsa brenda nje jave bashkia hipotekoi 50 pallate, pritet që brenda mandatit sipas Veliajt të përmbyllet i gjithë procesi.
