Projektligji për ‘Agjentët e huaj’ ka shkaktuar përplasje të forta mes protestuesve dhe forcave të policisë në Gjeorgji. Policia ka përdorur gaz lotsjellës dhe ujë, për të shpërndarë turmat jashtë ndërtesës së parlamentit.
Ligji për “agjentët e huaj”, parashikon se, çdo organizatë që merr më shumë se 20 për qind të financimit nga jashtë, duhet të regjistrohet si “agjent i huaj” ose do të përballet me gjoba të konsiderueshme.
Ky projektligj është kundërshtuar nga opozita dhe protestuesit, të cilët shprehen se propozimi do të rrisë ndikimin rus në vend dhe do të vendosë në rrezik të ardhmen evropiane të Gjeorgjisë.
Pas përplasjeve, 66 qytetarë janë venë në pranga, ndërsa autoritetet bëjnë të ditur se kanë mbetur të lënduar protestues dhe punonjës të policisë.
Më herët edhe shefi i politikës së jashtme të Bashkimit Evropian, Josep Borrell, është shprehur se ky projekt-ligj është një “zhvillim shumë negativ” për vendin dhe mund të ndikojë seriozisht në marrëdhëniet me BE-në.
