“Një javë fushatë”, është tema e kësaj të enjte në Quo Vadis në Vizion Plus nën moderimin e Pranvera Borakajt.
Ekspertja për çështjet zgjedhore Gerta Meta tha se ka një dilemë nëse diaspora do të quhet e përjashtuar nga penalitetet, duke qenë se nuk i nënshtrohet vëzhgimit si në vendin tonë.
Meta nënvizoi se diaspora shqiptare është disi më e ftohtë politikisht, nuk është peng si këtu tek ne, ku sipas ekspertes, shpesh iu kërkohet vota edhe përmes premtimeve për vende pune apo përfitime të tjera.
“Ne e kemi vlerësuar se kjo është një nismë pozitive, një investim që më në fund u mundëson të gjithë shqiptarëve një lloj komoditeti për të ushtruar të drejtën e votës. Ka një dilemë nëse diaspora do të quhet e përjashtuar nga penalitetet, në rast se do të ketë shkelje të asaj që quhet “vota e shenjtë”. Në Shqipëri ne i drejtohemi qendrave të votimit dhe kemi shumë vëzhgues, ndërsa kjo nuk ndodh në territoret jashtë Shqipërisë. Fleta e votimit shkon në familjet ku ata jetojnë. Ka raste që mund të ndodhin manipulime. Por këto janë të gjitha aludime.
Partitë politike duhet të kishin menduar më shumë për këtë proces. Është një e drejtë që u takon dhe një sfidë që duhet përballuar.
Është shumë e vërtetë që ka ardhur vota e parë. Mund të themi se diaspora shqiptare është disi më e ftohtë politikisht, nuk është peng si këtu tek ne, që shpesh iu kërkohet vota edhe përmes premtimeve për vende pune apo përfitime të tjera. Të gjitha këto ndikojnë në transparencën zgjedhore, ndaj procesi duhet të jetë sa më transparent. Unë besoj shumë tek diaspora.
Nuk e dimë ende si do të shkojë. Fushata ka filluar dhe në ato takime kemi parë pjesëmarrje për të mbushur sallat, por tani do të shohim sa i fortë do të jetë dialogu gjatë këtyre 30 ditëve për të kërkuar mbështetjen e tyre. Ne do kemi foto të votave që uroj mos të bëhen virale në rrjetet sociale. Shpresoj për këtë. Ndoshta është mirë që t’ua kujtojmë se, meqenëse kanë bërë investimin për t’u regjistruar në Platformën e Regjistrimit të Diasporës (PER), të kuptojnë se vota e tyre është shumë e rëndësishme. Shoqëria shqiptare po kërkon një ndryshim”, tha Meta.
/vizionplus.tv
