Reshjet e shiut të rëna gjatë natës nuk kanë kaluar pa dëme në disa zona të vendit. Problematike mbetet rruga nacionale Elbasan – Librazhd në vendin quajtur ura e Murrashit ku ka pasur rënie gurësh nga malet. Ato kanë bllokuar rrugën.
Gjatë gjithë natës është punuar për largimin e dherave dhe gurëve, për ta bërë rrugën të kalueshme për shoferët.
Në qytetin e Vlorës reshjet e shumta shkaktuan jo pak probleme në disa akse rrugore. Ato janë përmbytur gjatë natës.
Shkak është bërë bllokimi i kanalizimeve nga qeset plastike dhe mbetjet e tjera qe hidhen nëpër rrugë nga banorët.
Ndërkohë në Lezhe, drejtuesit e prefekturës po kërkojnë ndërhyrje nga autoritetet qendrorë për zonën e Torovicës, aty ku si pasojë e reshjeve ka pasur rënie gurësh që kanë rrezikuar edhe jetën e disa familjeve.